الثلاثاء، ٨ يونيو ٢٠١٠

زوجتي ام حمزه



النهارده ان شاء الله وبعد كمية المقالات العلميه انا قلت عايز اطلع من قلبي حبة مشاعر واحاسيس

انا عايز اتكلم عن الحلم اللي بحلم بيه كل يوم تقريبا
قاعد انا وام حمزه في الصاله وحمزه واسماء عمالين يذاكروا واحنا بنراجعلهم دروسهم اكيد انت عرفتوا الموضوع هيبقي عن ايه؟

الموضوع هيبقي عن زوجتي ان شاء الله وانا بحلم بزوجه مواصفاتها كالتالي

ان تكون ملتزمه دينيا وده هيبقي ظاهر علي ملابسها طبعا تكون ملابس فضفاضه لا تشف والألوان طبعا تكون هاديه

ان تكون علي قدر علمي جيد حيث لا اشعر بفجوه في النقاش

ان تكون من اسره طيبه متوسطه الحال وان تكون مشهوره بالأدب وبالتردد علي المسجد والأب مشهور بالصلاح وان تكون الأسره خاليه من الأمراض الوراثيه

لا بد ان ام حمزه تكون راضيه تتقبل الأزمات الماليه وان تساعدني علي اجتياز المحن اي ان تكون خير معين

ياسلام بقي لو ام حمزه طلبت ان تنتقب يااااااااااااه وتساعدني علي الإلتزام طبعا ان هحاول اساعدها بحيث ننهض سويا الي الصلاح

اكتر حاجه تضايقني في البنات انهن يضيفوا ولاد علي الفيس بوك والمسنجر ود بيسمح بحدوث انهيار في الجانب الأخلاقي عند البنات

ان تشعر بالمسئوليه دوما اي لديها القدره علي حل المشاكل بسهوله ويسر

أن تبني البيت علي اساس ديني متين لا يتزعزع ابدا

أرجو من الجميع التعليق بالإتفاق او الإختلاف وتوضيح نقاط الإختلاف وهل من الممكن ايجاد زوجه بالمواصفات ده ؟
واختم بهذا الحديث الشريف
يامعشر الشباب من استطاع منكم الباءة فليتزوج فانه اغض للبصر وأحصن للفرج

هناك ٩ تعليقات:

Mohammad Alaggan يقول...

كلام جميل وسهل كل واحد يطلب ويتمني لنفسه، لكن هل سألت نفسك مراتك حتحب ايه يكون فيك ؟ يا ريت تسأل نفسك وتحاول تكون لمراتك كما أحسن امنياتها
من يسأل عن واجباته قبل ان يسأل عن حقوقه أكيد حيكون زوج ورب أسرة كويس

thabet084 يقول...

جزاك الله كل خير علي التعليق

وانا ان شاء الله هحاول بقدر ما في وسعي

وانا معاك انت فكرتني بالقول المأثور
من اراد عائشه فليكن محمدا

Hossam El_Gazzaz يقول...

انا طول عمري بقول عليك عاقل
اولا كلام جمييييييييل جدا و اتمني انك تنول الي بتتمناه

اولا موضوع الاتزام الديني ده نسبي من واحد للتاني
يعني مثلا تكون حافظة القرأن كله ده التزام او تكون حافظه نصه ده التزام تاني

اما موضوع الامراض الوراثيه
انتا لازم تدور في كل عيله لسلسفيل جدها عشان تضمن
هو الصحه ببلاش
مع العلم انك ممكن تكون عندك في العيله امراض وراثيه فا متظلمش بنت عشان عمها عنده سكر و لا اخوها عنده فشل كلوي
ده ارزاق و ربك بيقسم الارزاق
وده مش معناه انك تاخدها عنده اي امراض وراثيه بس متعممش علي العيله

و الرضاء ده بردو نسبي و الازمات الماليه بردو نسبيه
يعني مفيش فلوس خاصل و ولا مفيش فلوس تروحو مصيف
خلي بالك ممكن انك يكون دماغك ان مفيش فلوس خالص و هي عندها الازمه انها متخرجش تتفسح مثلا يوم الخميس

اما النقاب ده فا ربنا يعينك عليه اما انا راي ان الي عايزه تتنقب تقعد في البيت و بلاش وجع دماغ
و غالبا ما البنت تقول انتا واخدني من بيت بابا كده فخلي بالك ولا تبني قصور علي الرياح

اما موضوع الفيس بووك ده موضوع شخصي مش من حق اي حد يدخل فيه هو ده مجتمعها و طريقتها الموضوع المفروض ميدقش ما احنا بنضيف بنات بردو
علي كده الواد الي يضيف بنت علي الفيس بوك يبقي مش كويس

اما موضوع المسؤوليه فهو تدريب علي مر سنسن قد تجد من هي متدينه ولاكن حمقاء و تجد من هي متدينه ولاكن قياديه هذا حسب التربيه ولاكن متريحش اوي علي موضوع اتخاذ القرار عند النسوان

اما بناء البيت علي اساس ديني متين انا اختلف معاك فيه تماما عشان الراجل الي بيبني البيت و الست الي بديره فا انتا لو بنيته هشك بشك هي هتديره كابريه اما لو بنيت البيت الله اكبر هتلاقيه مسجد فا مترجعش تقول انا حالتي قبل الجواز كانت احسن خد المبادره انتا و هي تكون تابع ليييك


اما عن وجود كل الصفات دي في بنات
اكيد ممكن تلاقي بس لو دول هما العشره علي عشره بتوعك فاستعد للاستقبال 9 من عشره و تامنيه من عشره
فالكمال لله وحده

و السلام عليكم

Unknown يقول...

حبيب قلبي ابو حمزة

هو بس سؤال هو سيف كان نايم وانت بتحكي القصة ولا علشان هو الكبير

وبعدين مفيش فايدة برده جبت ولدين احنا مش قلنا واحد بس علشان مايدخلش الجيش ويجي يحكيلك عن عطية ( العنبر كللاته ) او ابو سريع ( ركب )

عامة يتربي في عزك

وبالنسبة لمحمد نبيل ردا علي تعليقة ان المفروض الزوج يسال نفسه عن واجباته أؤكد لك ان محمد ( صاحب الموضوع ) اكتر الناس التزاما
عمره عمره ما هرب من مسؤلية
عمره مازوغ من طابور الكفار

نصيحة مني في الاخر مش هتلاقي كل المواصفات دي ومتدورش علشان هتتعب
لكن في الاخر هقولك الزوجة رزق خليك في طريقك وتقاك لربنا اللي انا عارفهم كويس وربنا هيرزق باحسن واحدة مفيهاش كل الصفات دي طبعا
بس حلاوة الحياة بالتكامل وان الناس تراعي بعض وكل واحد يستحمل التاني بمميزاته وعيوبه مفيش حد كامل


وفي الاخر انت برده واحشني ولازم اشوفك مينفعش كدة الندالة دي ياعسكري ياشنف

thabet084 يقول...

@shock
هو انت مبدأيا ما عرفتنيش بنفسك بس انا توقعت انت مين مين اسلوب كلامك اللي ماي حدش يتكلم كده انت والي قلتلك انت عامل زيه اكيد انت عرفته :D:D
وعلي كل شكرا جدا علي تعليقك بس انا لي تعليق علي كلامك بس علي الأمراض الوراثيه انا شفت بعيني واحد كان جدها عند مرض خبيث وامها ما عندهاش وهي ماعندهاش بس اخواتها عندهم وهي نقلت المرض لولادها تخيل!!!

اما موضوع الفيس بوك ده بقي موضوع انا بتخنق منه جدا وبعدين ما ينفعشي تقولي ده موضع شخصي مافيش حاجه شخصيه بين الزوج وزوجته وهي برضه لها انها تعترض علي اي حاجه هو بيعملها بس طبعا لازم تكون محقه

اما مووع النقاب ده انا مش عارف انا لما بشوف واحده في الشارع منتقبه بحس ان هي ده اللي نجت من الدنيا بعفه طبعا انا مش قصدي انا اللي مش منتقبين غير كده طبعا في نساء مش منتقبات اكثر تدينا من المنتقبات بس انا بتكلم عموما

انا طبعا عايز اعلق علي اسلوب كلامك بس يعني مش عارف اقول ايه انا كنت همسح التعليق بتاعك بس انا عندي حريه تعبير برضه

thabet084 يقول...

@ Ahmed Skart

جزاك الله كل خير يا شامي علي تعليقك وعلي كلامك الجميل بس محمد ثابت بتاع دلوقتي مش زي بتاع زمان نفسي ارجع تاني زي ماكنت

واحشني ياعسكري يا بلط علي راي الشاويش عطيه ولا فاكر الصول مصطفي بتاع الميس لما كان بيقول اهم حاجه تضرب العسكر علي محور ارتكازه
:D:D:D

عبدالرحمن يقول...

حبيبي أبو حمزة
ربنا يرزقك الزوجة الصالحة والذرية الطيبة
بس أنا أول مرة أسمع من أراد عائشة فليكن محمداً
الجملة بتتقال إذا أردتها فاطمة فلتكن علياً

غير معرف يقول...

اه جملة من اراد عائشة دي غريبة
ثانيا حوش وهات شقة و الذي منه وبعدين فكر في الجواز بلاش سنكحة
ثالثا يا عني ايه تتطلب تتنقب انت اصلا ناوي تخلي المسالة مفتوحة للنقاش
وعن الفجوة الفكرية صدقني اهم حاجة تعمل امسية ثقافية حولين صنية فتة او حوار بناء عن البسبوسة بالقشطة
ثالثا يبدوا تماماانك مش واخد بالك انك هتكون الراجل في الموضوع يا عني الشخص الي هيدبر ويتحكم شكلك عاوز واحدة ممكن تكون بتحب الفيس بوك وممكن تكون عاوزة تلتزم وممكن تكون يا باب محدش بيربي خدها منقبة ملتزمة وبلاش انصاف الحلول دي

ومسألة الصبر على الأزمات المادية شئ ضمني لا يمكن انك تحطه كشرط الا لو عاوز تقول لأبو العروسة الصراحة يا عمي عل الحلوة والمرة مش كنا متوعدين

غير معرف يقول...

ردا على سؤالك بتاع ممكن الاقى واحده كده اااااااااااااه ممكن انا لقيت
( قول ماشاء الله وبطل أر ) بما انك فى GCS انا جايلك بعد 8 أيام ان شاء الله نبقى نكمل كلامنا هناك

هشاااااااااام